వైష్ణవ జనతో song తెలుగులో

మహాత్మా గాంధీ గారికి ఎంతో ఇష్టమైన పాట వైష్ణవ జనతో హిందీలో ఉంది ఆ పాటని ఆచార్య ఫణీంద్రగారు తెలుగులో అనువదించి మనకు అందించారు. నాకు చాలాబాగా నచ్చింది. అందుకే ఆ పాటని అతని అనుమతితో ఇక్కడ పోస్ట్ చేస్తున్నాను.     

వైష్ణవ జనతో ... (తెలుగులో)

రచన : డా. ఆచార్య ఫణీంద్ర 

ఇతరుల దుఃఖము నెవ్వ డెరుంగు -

వాడె గదా భువి - వైష్ణవుడనగ!

ఇతరుల దుఃఖము నెవ్వ డెరుంగు -

ఎరిగి, సహాయము నెవ్వడు సేయు -

చిత్త మహంకృతి చేరగనీడు -

వాడె గదా భువి - వైష్ణవుడనగ!

ఇతరుల దుఃఖము నెవ్వ డెరుంగు -

వాడె గదా భువి - వైష్ణవుడనగ!

సకల లోకుల గను సాదరంబుగను -

పరులను నిందల పాల్జేయకుండు -

బుద్ధి వాక్కర్మల శుద్ధిగ నుంచు -

తత్పురుషుని గను తల్లి ధన్యయగు!

ఇతరుల దుఃఖము నెవ్వ డెరుంగు -

వాడె గదా భువి - వైష్ణవుడనగ!

సమదృష్టి గలుగు - తృష్ణల త్యజియించు -

పర కాంతలను మాత పగిదిగ జూచు -

జిహ్వ యసత్యము చెప్ప దెప్పుడును -

అన్యుల ధనముల నంట డెప్పుడును -

ఇతరుల దుఃఖము నెవ్వ డెరుంగు -

వాడె గదా భువి - వైష్ణవుడనగ!

కామ మోహ క్రోధ కపట లోభముల

మునుగకుండ మదిని ముక్తిని గోరు -

రామ నామమును నిరతము ధ్యానించు -

తనువున పుణ్య తీర్థముల ధరించు -

ఇతరుల దుఃఖము నెవ్వ డెరుంగు -

వాడె గదా భువి - వైష్ణవుడనగ!